家己栽一欉，卡贏看別人

līm bhuan-ziōk/2003.08.10

最近阮導師佇上課的時，共阮分析一篇「兩岸大學生競爭力」的調查報告，伊的結論是：「台灣的青少年學生，愛會記得，未來是卜佮十三億人口競爭，絕對毋是干那佇國內佮家己人拚輸贏爾爾。

聽了老師一番的分析，予我掣(cuah-)一下，心內著生驚；想講，無偌久，我著愛面對生存佮對岸大車拚，「輸人毋輸陣」，家己若無三二步策仔，是卜按怎佮人徛起咧？到底愛用啥乜方法？啥乜態度？啥乜思考？才有法度提升家己的能力咧？

想來想去，我想著一句台灣俗語：「家己栽一欉，卡贏看別人」，這是鄉土教學老師上課的時介紹e！現此時台灣囡仔上好的辦法，只有靠家己扑拚學習，認真培養實力，比人卡榾力，比人卡付出，毋驚艱苦，才會當出頭天。袂使干那想卜靠人(lang^o)；抑是等政府來替咱解決問題，靠序大人安排，等貴人來牽成；愛有一切靠家己的認知，確定方向，積極面對挑戰，才是根本的重點。卜去求別人，不如先培養實力，做上好準備，等待時機，著毋驚對岸的挑戰抑是全球化的威脅。

整個全球化的大環境，已經進入到「知識經濟」的時代！咱若無培養卡濟優秀的人才，經濟是無可能繼續發展，社會嘛無法度繁榮、進步。過去長期富裕的生活，煞予阮即代的少年人失去了熱情佮理想，干那想卜食好做輕可，追求物質的享受，將頂一代勤儉扑拚的精神撣挕搡，人人想投機、靠運氣、凡事速成的心理普遍存在，致使造成素質降下(gē)，國家競爭力相對退步，加上大環境無好，社會愈袂安定，惡性循環之下，煞愈來愈無信心，最後毋是罵政府著是怪罪大環境，其實負上大責任e是家己。

人定定想卜要求別人，卻是毋知影去要求家己。其實靠別人，是袂靠得e，俗語講得好「倚山山崩，倚壁壁倒，倚豬稠死豬母」。逐家斟酌共想看覓，一個人想卜有成就，一定愛付出辛苦的代價，無可能蹺跤撚喙鬚，成果著對(ùi-)天頂跋落來。譬如：想卜健康，著愛運動，食食正常、睏眠飽足，這攏是無法度靠人e^o。請教一大堆專家，家己若毋下決心，嘛是無采工。

俗語講「驚驚袂著等」，佇面對全球化的競爭，咱無驚惶、無躊躇，上驚對家己無信心，咱台灣若卜有未來、有遠景、有出路，認真講無啥乜撇步，上好的步數是人人跤踏實地、敢食苦、願犧性、肯付出、有創意，按爾咱自然著有本錢佮人比拼。

總講一句：凡事先靠家己，認真扑拚，抱著食苦若食補，有擔當，有勇氣的精神，按爾不但個人有光明的前途，咱的社會、國家自然著會進步、繁榮。